احداث بيت الجده << البيت الذي لا ينام (( الجزء الثاني ))

بقلم بنت خالتي الحلوه << ادري ازعجتكم هع

------------------------------------------------------------

احداث في بيت الجدة الذي لا ينام (الجزء الثاني)


اشتقت للرياض وهلها واشتقت للسويدي و لمحطة نوح وبقالة مدهش و الدباب الاسود اللي مرتز عندها وصاحب الدباب اللي ما يعرف يحاسب ويحسب ان العشرين ريال 200 ريال ..وحنيت على ابوي انه ياخذنا للرياض لانه كان حاجز لنا نروح لروما بس حاولت اقنع اهلي وابوي بالرجوع عن هذا القرار وقلت لهم وش تبون بروما وجوها القبيح.. وبعد محاولات لا يتخللها اليأس اقنعتهم بالرياض ومسكنا خط الرياض ووصلنا بالسلامة..


وصف لحالة البيت الذي لا ينام لحظة دخولنا..
مافيها اي جديد..
الا استنو لحظه لحظه تذكرت ....في الصاله كنب جديد, من كشخته ما نقدر ننزل ببجاماتنا لازم ننزل وحنا كاشخين..

الموهييم.. دخلنا البيت الذي لاينام وسلمنا على خالاتي وعلى الجدة اللي كانت قاعدة تلعب كيرم مع حدى احفادها وكانوا يتبارون على الحمرا وكسوتها .. كانت الله يطول في عمرها تبنط** على الحمرا تبي تكسبها ويوم شفتها متحمسة قلت: انتبهي لاتاخذين السودا ترى بتحطين 25
قالت: يالله على بابك
قلت:لا خاب طلابك << على الخط دائم(ن)
بنطت وطاحت السودا تحت صراخ باقي احفادها وحطت 25 وكملوا وقعدوا من الساعة 11 الى الساعة 4 فجرن يحاولون يخلصون ملعب الكيرم اللي حالف انه ما يخلص..

بنطت: مأخوذ من التبنيط وهو ضرب مضرب الكيرم في جهة معاكسة لجهة الحبوب عشان يرجع عليهم ويطيحهم في الفتحة.


الى الان الاحداث تشبه الجزء الاول..


ندخل في صلب الموضوع اذا تذكرون في موضوعي السابق كتبت عن حضرة المستأجر البرصي الكبير اللي كان ساكن الغرفة اللي ننام فيها..في هذي الرحلة قد تم اغتياله.. بهجوم نفر من الشغالات والبزران عليه وكأنه ياعمري يقدر يدافع عن نفسه مع ذا الهجوم اللي يصاحبة تصوير بكاميرات الفيديو و الجوالات..ليه يغتالونه..هل لان الجائزة كانت 5 ريال للقاتل؟؟ يمكن هذا دافع لبعض الشغالات..

حرام عليهم يدرون انه رفيق دربي وصديق عمري والجليس الصالح اللي اقعد واسولف معه كل ما جيت للسويدي, والله ماانسى وقفاته معاي.. لاكنت حاطة يدي على خدي من الزهق ارفع راسي والقاه يتمشى عالجدار يطالعني بابتسامتة الجذابة القاااتلة.. ويقول: هاي كيفيك شو بكي؟
ارد : مافيني شي
البرصي: ييي شو خيتو شو اللي مدايئيك؟
ارد: قلتلك ما فيني شي اقلب وجهك
البرصي: يوو علينا هالكلام , لازم تحكيلي شو اللي مدايئيك يخرب بيت اللي مزعليك شوو الاهل راحوا للسوق وما رحتي معوون؟؟ احكي احكي انا ليش هووون تئبريني

وبعدين اقعد افضفض له واخفف عن نفسي شوي.. والله كان محترم نفسه حتى التفلة ما تفل بوجه واحد من المبزرة الموجودين في البيت .. اللي كل ما شافوه يتمشى عالجدار جدعوا نعلة عليه حسبي الله عليهم.


واحسرتاه عليك يابرصي يا صديقي
كنا نركض ونلعب مثل الفريقي
توقف عالجدار تحتريني انام مثل الغريقي
واذا حسيت انك في خطر حطيتك داخل صناديقي
انا حارسك اللي ما تخليت عنك وقت الضيقي
وابتسامتك اللي كل ما شفتها اضيع طريقي
بس اغتالوك وانا في الحمام يا رفيقي
مانسى صورتك لو زلوا القهوة داخل إبريقي
ولا شكل البيض وهو طالع من جوانبك كنه لؤلؤ البحر الاغريقي

**بعد الهجوم عليه واغتياله ..البرصي على زولية الموت**


للمشاهدته ,, انقر على الرابط


http://top3gp.com/6/top3gp_26322137.3GP








تتالت الأحداث وكان أهمها بعد اغتيال البرصي هروب شغالتنا ..


في صباح إحدى الأيام.. وكان الكل نيام.. ماعدا الجدة في الغرفة تلعب فرشة.. وانا احلم بالبرصي يوم كنا نلعب حبشة.. ومحمد السواق يفكر شلون يوخر الكرشة.. تجي حليمة بولند مخترشة.. تصحي المدام :مدام مدام هادا باب كلو مفتوح هادا شغالة انتي في اهرب انا في دور مافي شوف هادا كلو اغراض مافي اففف افف ليه ما تهرب من دمام ليه في اهرب من رياض<< اعنبوتس شغالتنا والا شغالتس اللي هربت

قالت لها المدام وهي تحت تأثير الصدمة: روحي انتي و زوجك الدب دوروها في الحارة يمكن تلقونها

طلعت حليمة بولند وزوجها الدبي وخذو لفة , ودخلوا القهوة وخذوا منها رشفة, وراحوا الكابريه ورقصت حليمة بولند بكل شوق ولهفة, وتهاوش زوجها الدبي مع واحد قام ودفة , وقعدت حليمة بولند تسولف عن عرس صديقتها وعن الزفة , ورجعوا للبيت يعنني انهم كانوا يدورون على شغالتنا ..
طبعن كنا حاجزين لاستراحة في ذاك اليوم وهروب شغالتنا ما يعوقنا عن الروحة لان وجودها مثل عدمة <<<تسذااابة

يوم جينا نطلع للاستراحة راحت امي للمعلاق تبي تاخذ عبايتها ونقابها وكان المعلاق الصامد قاعد يتشهد من كثر العبايات لانه في أي لحظة بينهار ويطيح..ولكن النقاب موب موجود و بعد البحث والفرز والتفكيييييييير استنتجنا ان الشغالة ماخذتن نقاب الوالدة عشان تتستر فيه ونجت الحقيرة بفعلتها ..
وتحسفت امي على تعليق النقاب وقالت: لوما علقت النقاب ما هربت الشغاله. .


ومن الاحداث اللي فعلها مستمر غير منقطع في الرياض هو الاستراحات اللي طلعت من خشومنا..


اللي يروح للرياض لازم يصير زي اهلها الطيبين .. روحات الاستراحة يوم ورا يوم شي مستحيل يصير بالدمام بس في الرياض ما في شي اسمه مستحيل, تروح في ذاك ويسون لمخك غسيل, حتى اسم اصالة تنساه وتسميها اصيل, احيان(ن) افكر اسمي بنتي سعابيل , بس اخاف الناس يسموني يا ام سعابيل, حتى استراحة فاروق صارت استراحة للمهابيل, وماليزيا صارت مصيف لكل عابر سبيل. .<<وقفي عن الكتابة لاخطبتس بالنعلة الحين

من كثر تحمس الاهل للاستراحات صاروا قبل ما يطلعون من استراحة لازم يتأكدون من حجزهم للاستراحة اللي بيروحون لها بعد بكرة.. ويحسبون القطية من كم.. حتى شكيت ان ابو عماد داخل معهم في القطية لاني سمعته بالصدفة يقول لخالتى (الئطية من كاااام في الاستراحة ديّت؟؟) ..لا ونتحمس نجيب استريو من غير اشرطة.. بس هذا ما يمنع خالاتي يصفون ويقعدون يغنون للبزران: (النّهِ نّه النّهِ....الخ) << هذي الاغنية من الفلكلور الخاص بتراث العائلة , ويقولون للبزران اللي بيرقص ويتهيبل بنعطيه تشبس..

ومن شروط الاهل قبل ما يختارون أي استراحة:


1) الحمام عربي والا افرنجي <<عشان الجدة ما تنفقس وتحمق وتخنفس اذا عربي
2) هل البركة خضرا والا زرقا
3) هل الثيل مستوي والا فيه منحنيات كثيرة
4) وجود البلكّات عشان تقعد الجدة وتلعب ضومنة <<كان ودها تجيب الكيرم بس اقنعناها ان الضومنة اسهل للنقل
5) مافي شرط بس رقم حسين عبدالغني<< يا شين اللي ما يعرف يختار لاعب



**قبل ما اختم موضوعي الهادف واللي يحمل رسالة سامية ابي اعرف ليه اهلي يغتالون البرصي؟؟ الحين اقعد مع مين واسولف مع مين لارحت للسويدي وصرت زهقانة..؟؟ والله ان الجدار صار ينشد عن البرصي مثل ما تنشد قهوة حليمة بولند عن الهيل..

**وابي اعرف ليه تهرب شغالتنا مو كافي السواق هرب قبلها بسنة لعنة الله عليهم..هروب الشغالات والسواويق كاثر هالسنة. . مدري ليش احس ان طاش ما طاش بيجيب حلقة عنهم..وقولوا ماقلت بعد. .<<يا شين اللي ودها تهاوش