احداث بيت الجده << البيت الذي لا ينام

بقلم بنت خالتي الحلوه

وحبيت انقله لكم

--------------------------------------------

المقدمة:

هذي القصة صارت في عطلة العيد وكانت مؤثرة جدا على العائلة ودلت على ان امي اقوى شخص في العائلة التي تتكون من اكثر من 50 فرد ساكن في بيت واحد.. بيت الجدة الذي لا ينام

البداية:

قبل ما تبدى العطلة اختلفنا انا واهلي على مكان الاجازة
قلت" انا بروح استراليا"
قالت اختي " لا انا بروح فنزويلا"
قالت اختي اللي بعدها" لا انا ابي سويسرا بلا فنزويلا بلا هم"
قال ابوي" اقول اذا ما اتفقتوا على مكان مالكم الا الرياض عند جدتكم وخالاتكم"

لا لا لا خلا ص يبه اتفقنا على امريكا ..

قال ابوي "وين في امريكا؟"
قلت " انا ابي فلوريدا"
قالت اختي " ابي لاس فيغاس <---- (ياسااااتر)"
قالت اللي بعدها "ابي كاليفورنيا"
قال ابوي "خلاص بتروحون للرياض"

وانتهى الحديث الى هنا

وهذي حالنا بداية كل عطلة نختلف وين بنروح وفي الاخير يصير في السويدي <---- (مادريتا يقولون انه الحي الاشهر في الرياض يعني زي بيفيرلي هيلز في كاليفورنيا)

ومن هنا نبدا القصة ضبينا اغراضنا وحملناها في السيارة ومسكنا خط الرياض .. يوم وصلنا بيت الجدة ودخلنا الى ((البيت الذي لا ينام))
لقينا كل خالاتي وورعانهم مرتزين مع شنطهم ناويين ينامون كلهم في بيت الجدة البيت الذي لا ينام <----( لاينام يعني اللي فيه نص ينامون ونص يسهرون وبعدين اللي يسهرون ينامون واللي نايمين يقومون يسهرون والجدة ما شاء الله عليها تسهر مع النصين يعني لا تنام)

الموهيييم** درعمنا وسلمنا على الجدة وعلى خالاتي وقعدنا وتقهوينا كالعادة وتماعطنا بقايا الحلى اللي متقاطين فيه وجايبينه من (سنابل السلام) <----(ياتسبدييييييييي), ويوم جا وقت النوم تهاوشنا على البطانيات والمخدات واخيرا كل واحد حصل على ما قويت يداه على اخذه..


الكل طبعا يبي ينام في غرفة وحدة والسبب <---- (عشان يصير في قلب الحدث وما يفوته شي) على كبر بيت الجدة كلنا ننام في غرفة وحدة طبعا هذي الغرفة اللي ننام فيها ما تقدر تفتح بابها لانه من الزحمه في اشخاص نايمين ورا الباب..

وعشان تدخل كود ترجف الانسان اللي نايم ورا الباب<----(ياعذااابي)..
في البيت الذي لا ينام (بيت الجدة) فيه غرفة مقفولتن بالمفتاح من سنة كح واظرط , يقال انها محجوزة لخالي اللي ما زد وطوط وهذي الغرفة فيها سرير لذا هي مطلوبة بقوة علمن ان الغرف الباقية ما فيها أي سرير عدا سرير واحدن في الغرفة اللي نتزاحم فيها وفيه حفرة بالوسط يعني منطعج <----( لاتعليق) والمفتاح مع جدتي ما تبي تعطيه احد لاسباب خاصة تأتي مع سياق القصة..

اليوم الثاني جلسة المطالبة بالمفتاح:

امي و خواتا والبنات والمبزرة مرتزين في الصالة ينظرون الى الجدة.. وكلهم اذان صاغية
قالت الجدة بصوت عالي :معصي ماحدن داخل الغرفة
امي : وراه يوه فيها سرير نبيها عطيني المفتاح
قالت الجدة :اها بس,وشوله عندكم سرير يسد <----(قصدها اللي مكسور بالنص ياعذاااابي)


الموهيييم** وبعد ملاسن وملاجج بين امي وجدتي ربحت امي القضية وحصلت على مفتاح الغرفة المهجورة..واثناء الحوار بين امي و الجدة ..
قال حدى البزارين يشتكي لخالتي: يمة شوفيها رجدتني
قالت خالتي : اللي بينام الحين بكرة بيروح لابو ريالين
وفي لحظة ما نشوف الا غبرة المبزرة <---(ابو ريالين المنقذ)


دخول الغرفة:

كلنا واقفين عند باب الغرفة جابت امي المفتاح وفتحت الغرفة ودخلنا كلنا هجووووم الى الغرفة لان اللي بيطب على السرير هو اللي بينام فيه لين نهاية العطلة..
صرخت امي بصوت جهوري " بناتي هن اللي بينامن فيها"
طبعا من حقها لانها هي اللي طالبت بالمفتاح .. الموهييم** ان الغرفة صارت لنا لان امي دائما هي الحلقة الاقوى..الباقي رجعوا للغرفة اللي سريرها فيه حفرة بالوسط بس مع وجود الحفرة في السرير الكل يبي ينام عليه..


وقت النوم:
الكل يحجز مكان ينام فيه والخسران طبعا اللي بينام ورا الباب .. يوم دخلت امي بكل ابهة للغرفة اللي طالبت بقوة بمفتاحها وانتصرت..لقت شخص اخر قد احتل الغرفة قبلها فمن هذا الشخص؟؟

شخص كان واقف على الجدار .. كبره كبر نعلتن مقاسها 41 وكان هذا الشخص ينظر بغضب الى امي اللي دخلت الى مملكتة وهو توه مسدد ايجار الشهر اللي فات للجدة, وفوجئ الشخص بهجوم النعال عليه من كل جهة ولكن لم تصبه أي نعلة سوى النعلة التي جدعتها امي عليه بكل ما ملكت من قوة وطاح البرصي على الارض ودخل تحت السرير وراحت امي تنفظ السرير طلع ودخل داخل المكيف جابت امي الشطرطون ولزقت المكيف .. بس الظاهر انه دخل بطريقة ما.. وبعدها عرفنا سبب قفل الغرفة بسبب حضرة المستأجر.." class="inlineimg" />


ليلة ما قبل العيد:
ليلة ما قبل العيد الحمامات سرى كود تنتظر, استشورات تدهر,وكلن يطالع الثاني منبهر, والمطبخ مزدهر, والبرصي منقهر..في تالي الليل يجينا الخبر,حدى ذا البزران في الغرفة منقفل عليه الباب ماعرفنا منهو, كود نجرد ونعد ذا المبزرة لين نحدد هوية الضحية <---- (ياليل ماطولك)


المعادلة الحسابية لتحديد الهوية:

ش = المبزرة اللي شعورهم مستشورة
شَِ = المبزرة اللي شعورهم موب مستشورة (نفي ش)
س = المبزرة اللي سبحوا
سَ = المبزرة اللي ما بعد سبحوا

[align=center]المبزرة = ش + شَ
شَ = س + سَ
ش = س

بعد التعويض:

المبزرة = س + (س + سَ)
المبزرة = 2س + سَ [/align]

عقب جلد طرفي المعادلة بالسوط طلع الناتج وحدة من اصغر خواتي اللي تحقق الشرط شَ سَ <--- اللي مصكوك عليها من رجعوا من ابو ريالين البارح..



في بيتنا شرطي:

بعد صولات و جولات فاشلة لمحاولة فتح الباب , دقت امي على الدفاع المدني الساعة 3 فجرن, خذ الوصف وماهنا اسهل من وصف محطة نوح.. وصل الشرطي مرتاااع من المكان والزمان فتح الباب وفاضوا عليه البزارين, ودخاخين الاستشوار خلته يسأل هل هو حريقة والا بابن مصكوك؟؟





الشرطي لحظة وصوله البيت الذي لاينام [align=left][/align]






وفي الحوسة جدتي تناشد الشرطي بقيم كيرم تقول تعال اطلعك..والا نلعب ضومنة والقيم من عشرة ,سحب عليها و رقى الشرطي وسبقوه المبزرة للغرفة يوم فتح الشرطي الباب وصفق الجماهير والحضور ولقى الضحية تلون بالدفتر والبرصي مسنتر يبي من يكوي شماغة حق العيد..

الشرطي يبي ياخذ الاجراءات من صورة وبصمة وغيرها.. والبزران سبقوا الضحية للالتقاط الصورة ارتزوا وفتحوا خششهم على بالهم مراسل قناة المجد.. وفي النهاية طلعت الصور ة ولا وجه باين بسبب الشعوووور المسبسبة على وجيه هالورعان..

وفي العيد قعدنا نقحن من هالقهوة وهالشاي واللي داخل واللي طالع وصرت احس ان البيت صار اسمه البيت الذي لا يفضى..

وقعدنا على هالحال لين مسكنا خط الدمام ورجعنا..


والاحداث ما تنتهي بالبيت الذي لاينام.. لو اقعد الى باتسر وانا اطقطق ماخلص.. يالله فمان الله بانتظار تعليقاتكم..



وانتظرو الجزء الثاني

لووووووول